Consello de Ministros
O Consello de Ministros autorizou hoxe a subscrición de dous convenios de colaboración entre o Ministerio de Educación e as comunidades autónomas de Andalucía e Cataluña, respectivamente, para destinar máis de 42 millóns de euros á aplicación do plan de apoio á implantación da Lei Orgánica de Educación (LOE).
En concreto, a Junta de Andalucía disporá dun total de 25.733.051 euros, mentres que a Generalitat de Cataluña de 16.597.094, cantidades que se acordaron no Consello de Ministros do pasado 4 de xuño, momento en que se fixou a distribución de 106´8 millóns de euros entre todas as Comunidades Autónomas para apoiar actuacións directamente derivadas da lei ao longo do período da súa implantación.
O diñeiro que hoxe se destina a Andalucía e Cataluña, tal e como establecen os respectivos convenios, irá destinado á posta en marcha de programas de formación do profesorado, de apoio á implantación do ensino e a aprendizaxe de linguas estranxeiras (PALE), e de mellora do éxito escolar. Ademais, servirán para desenvolver programas dirixidos a diminuír as bolsas de abandono escolar temperán e á extensión ou modificación do tempo escolar.
