Consello de Ministros
O Ministro de Educación, Ángel Gabilondo, presentou hoxe o Consello de Ministros o "Informe sobre o Sistema Universitario Español ante a apertura do curso académico 2010-2011". Será un curso caracterizado pola plena adaptación dos títulos ao Espazo Europeo de Educación Superior e polo apoio prestado á partida de bolsas e axudas, cuxo orzamento aumenta ata os 1.530 millóns de euros.
O informe recolle a realidade estatística das universidades españolas e propón estratexias a partir delas para aumentar a influencia beneficiosa da universidade na sociedade e a economía, así como o benestar persoal e a empregabilidade dos egresados. Estes obxectivos xa están recollidos no Plan de Acción 2010-2011 e nos Obxectivos da Educación para a década 2010-2011, onde se destaca a necesidade de impulsar a modernización do sistema universitario español.
Este curso universitario o número de estudantes matriculados ascende a 1.600.000, un 10 por cento máis que o curso pasado.
En 2010-2011, todos os primeiros cursos ofertados polas universidades axústanse xa á estrutura curricular fixada no Espazo Europeo de Educación Superior. 2.338 graos, 2.429 masters e 1.624 doutoramentos foron xa verificados polo Consello de Universidades. Iníciase agora un proceso de seguimento e garantía de calidade das titulacións implantadas. O Espazo Europeo de Educación Superior permite adaptar as titulacións ao mercado laboral e ás necesidades sociais, ofrece aos egresados flexibilidade para completar ou reorientar a súa formación e mellora a súa empregabilidade.
España está efectuando un importante esforzo económico para conseguiro: os últimos datos facilitados pola OCDE reflicten que o gasto público español en Institucións de Educación Superior en relación ao PIB per cápita foi do 39,9% en 2007, o que mellora significativamente a posición do noso país e achégao á media da OCDE (40%).
Destaca o orzamento previsto para o curso 2010-2011 en bolsas e axudas, que seguen sendo eixe prioritario da política do goberno pese ao contexto de contención do gasto, ascende a 1.530 millóns de euros. É un incremento de 100 millóns de euros que se destinará fundamentalmente a potenciar as bolsas salario. Tamén se seguirán potenciando as bolsas de mobilidade (Eramus, Comenius, Grundtvig e Leonardo da Vinci), xa que tal mobilidade aumenta a capacidade de encontrar ou mellorar no emprego e enriquece persoalmente aos estudantes. Finalmente, continúase co programa específico dirixido a financiar a matrícula de masters ao colectivo dos titulados desempregados, cunha dotación de 14,68 millóns de euros.
O número de estudantes estranxeiros medra nas aulas españolas (este ano haberá máis de 80.000, un 23,3% deles realizando un doutoramento). Isto revela que a universidade española que se vai afianzando como foco de atracción de talento. Tamén se acadan novos máximos nas cifras de estudantes españois con bolsa Erasmus (un 15,4% máis que o curso anterior, ata chegar aos novos 29.219 estudantes), mentres o noso país segue posicionado como un dos destinos favoritos para o Erasmus doutros países europeos.
O informe conclúe que os vindeiros 10 anos serán cruciais para ter unha España que compita nun medio internacional cada vez máis complexo. A modernización das universidades é vital para o benestar económico, social e persoal dos cidadáns.
