O ministro de Educación español, Ángel Gabilondo, e a ministra de Educación e Cultura do Principado de Andorra, Susanna Vela, asinaron un acordo para facilitar o acceso dos estudantes de ambos os dous países aos centros universitarios dos seus respectivos sistemas educativos.
O convenio recolle o mutuo recoñecemento dos títulos, diplomas e certificados esixidos para o acceso á universidade por parte dos estudantes españois e andorranos en conformidade coa lexislación interna de cada país e en réxime de reciprocidade.
O texto establece que os estudantes de Andorra que desexen acceder á Universidade en España terán que estar en posesión do Título de Bacharelato do sistema educativo andorrano ou do Diploma profesional avanzado, mentres que aqueles españois que queiran cursar estudos no Principado deberán ter o Título de Bacharelato e a Proba de Acceso á Universidade, ou ben o Título de Técnico Superior de Formación Profesional, Título de Técnico Superior de Artes Plásticas e Deseño, ou o Título de Técnico Deportivo Superior (ou equivalentes anteriores).
