Acto enmarcado na Presidencia Española da UE
A secretaria de Estado de Educación e Formación Profesional, Eva Almunia, inaugurou a conferencia "Indicadores, obxectivos e políticas educativas", que se enmarca dentro dos actos da Presidencia española da Unión Europea, e que ten lugar na sede do Consello Escolar do Estado.
Á conferencia asisten representantes no Standing Group of Indicators and Benchmarks da UE, representantes das comunidades autónomas, membros do Consello Reitor e do Grupo Técnico do Instituto de Avaliación, representantes do Consello Escolar do Estado e presidentes dos consellos escolares das CCAA, responsables do Ministerio de Educación e expertos internacionais.
O obxectivo principal da conferencia é reflexionar sobre os obxectivos educativos, os indicadores que permiten valorar a súa consecución e o uso dos resultados dos indicadores para orientar as políticas educativas e para promover a mellora do funcionamento das escolas e da educación.
Durante a súa intervención, Eva Almunia adiantou que España proporá durante esta conferencia "o enriquecemento dos dous indicadores que constitúen a espiña vertebral dos sistemas educativos: o referente ao abandono escolar e o referente ao número de persoas adultas que completaron a educación secundaria superior. Dous indicadores que replican, como non pode ser doutra maneira, os datos obtidos a través da enquisa de poboación activa, é dicir, datos relacionados coa economía. Na nosa opinión, cómpre enriquecer estes datos coa valiosa información de carácter educativo que ofrecen as taxas de matrícula e as taxas de graduación".
