Gabilondo: "Por primeira vez Europa escríbese con E de Educación"
O ministro de Educación de España, Ángel Gabilondo, afirmou que "por primeira vez Europa escríbese con E de Educación" na rolda de prensa posterior á segunda xornada da Reunión Informal de ministros de Educación da Unión Europea que tivo lugar en Madrid.
Na comparecencia ante os medios Gabilondo, que interveu xunto á comisaria europea de Educación, Cultura, Mocidade e Multilingüismo, Androulla Vassiliou, destacou as principais conclusións da cimeira ministerial: reducir o abandono escolar e aumentar o número de titulados superiores.
Ambas as dúas prioridades enmárcanse na decisión do Consello Europeo do mes de marzo en que se acordou que a Educación debe ser unha das liñas fundamentais de actuación da Estratexia Europa 2020.
A Presidencia Española incorporou ao debate a importancia da dimensión social da educación, a súa relevancia como elemento fundamental para conseguir unha recuperación económica ordenada e sostible, que dea paso a un modelo de crecemento baseado no coñecemento e na igualdade de oportunidades.
