Constituído o Foro da Educación de Ceuta
24 de marzo de 2010
Este novo órgano asesorará o Ministerio de Educación sobre o desenvolvemento das actuacións educativas na cidade autónoma
A directora xeral de Avaliación e Cooperación Teritorial do Ministerio de Educación, Rosa Peñalver, presidiu o acto de constitución do Foro da Educación de Ceuta, órgano consultivo en que está representada toda a comunidade educativa da cidade autónoma.
Este Foro ten como obxectivo orientar e asesorar o Ministerio sobre situacións referidas á aprendizaxe escolar, impulsar a elaboración de informes, estudos ou diagnósticos en materia de oferta educativa, e propor medidas que axuden a mellorar os resultados escolares na cidade de Ceuta.
O Foro está composto por:
- Dous representantes da Administración educativa do Estado
- Cinco profesores nomeados a proposta das organizacións sindicais
- Tres nais ou pais de alumnos
- Tres representantes do alumnado
- Un representante do persoal de administración e de servizos
- Un titular de Centros docentes privados
- Un representante da Universidade
- Un representante da Administración local
- Cinco personalidades designadas en atención ao seu recoñecido prestixio no campo da educación, da renovación pedagóxica e das institucións de maior tradición e dedicación ao ensino
- Dous representantes das organizacións empresariais
- Dous representantes das organizacións sindicais.
As funcións do Foro da Educación de Ceuta serán as seguintes:
- Actuar como órgano de asesoramento, análise e difusión de información periódica relativa á situación da educación non universitaria.
- Promover a mellora da equidade e a calidade do ensino en todos os seus aspectos.
- Recoller e analizar información sobre medidas e actuacións postas en marcha desde as diferentes instancias, públicas e privadas, para mellorar a xestión educativa
- Difundir as boas prácticas educativas en relación coa atención á diversidade, a integración e o éxito escolar, a inmigración, o maltrato infantil e a igualdade de xénero.
- Promover a colaboración entre todas as institucións implicadas en materia de distribución de alumnos para os efectos de escolarización, tendo en conta a normativa vixente.
- Asesorar sobre cuestións relativas á promoción e extensión educativa
- Propor a adaptación do calendario escolar ás necesidades e características da sociedade ceutí.
- Actuar como foro de encontro interdisciplinar entre organismos públicos e organismos privados acerca da educación non universitaria
- Formular propostas de actuación tendente a mellorar a vida nos centros educativos e, en xeral, á consecución das fins previstas na Lei Orgánica de Educación, relativos á educación no respecto dos dereitos e liberdades fundamentais, na igualdade de dereitos e oportunidades entre homes e mulleres e na igualdade de trato e non discriminación das persoas con discapacidade, a educación na responsabilidade individual e no mérito e esforzo persoal e a capacitación para o exercicio de actividades profesionais e para a participación activa na vida económica, social e cultural.
- Elaborar informes periódicos sobre a evolución dos asuntos relacionados coa educación no ámbito da cidade de Ceuta e as medidas adoptadas para a súa mellora.
- Formular propostas sobre cuestións relacionadas coa calidade do ensino.
