Os títulos universitarios oficiais son documentos públicos con validez en todo o territorio nacional e, por iso, non poderán ser obxecto de modificacións, alteracións ou emendas. Por este motivo, calquera modificación no título (cambio de nome, cambio de nacionalidade, rectificación, incorporación de novos datos no título tales como premios relevantes, superación de novas especialidades, superación da proba de grao...) supón a anulación do título orixinal e a expedición dun duplicado.
Non se expedirán duplicados por cambio de texto, erro material ou deterioración dun título sen recibir previamente o título orixinal ou a parte do mesmo que permita a súa identificación.
En caso de extravío do título será requisito previo e indispensable para a obtención dun duplicado, a publicación no Boletín Oficial do Estado dun anuncio mediante o cal se faga constar o suposto extravío a fin de propiciar, se é o caso, as oportunas reclamacións. Se estas non se producisen no prazo de trinta días a partir da data de publicación do anuncio, iniciarase o trámite para a expedición do duplicado correspondente. A iniciativa para a publicación do anuncio corresponderá á Unidade de Títulos, Escola ou Centro da Universidade correspondente. Tanto o custo da publicación do anuncio de extravío neste diario oficial como o importe da taxa por expedición do duplicado correrá a cargo do interesado.
A solicitude de duplicados de títulos realizarase seguindo o procedemento indicado para a primeira expedición. Non obstante, o interesado está exento do pagamento da taxa de reexpedición do título se o erro contido no título, a deterioración ou o extravío fosen por causas imputables á Administración.
