Vostede está en:

Educación Primaria

A Educación primaria ten carácter obrigatorio e gratuíto. Comprende tres ciclos de dous anos cada un, en total, seis cursos académicos, que se seguirán ordinariamente entre os seis e os doce anos de idade. Con carácter xeral, os alumnos e as alumnas incorporaranse ao primeiro curso da Educación primaria no ano natural en que cumpran seis anos.

A finalidade é proporcionar a todos os nenos unha educación común que faga posible a adquisición dos elementos básicos culturais, as aprendizaxes relativas á expresión oral, á lectura, á escritura e ao cálculo aritmético, así como unha progresiva autonomía de acción no seu medio.

A Educación Primaria contribuirá a desenvolver no alumnado as seguintes capacidades:

Utilizar de maneira apropiada a lingua castelá e a lingua oficial propia da Comunidade Autónoma.
Comprender e expresar mensaxes sinxelas nunha lingua estranxeira.
Aplicar ás situacións da súa vida cotiá operacións simples de cálculo e procedementos lóxicos elementais.
Adquirir as habilidades que permitan desenvolverse con autonomía no ámbito familiar e doméstico, así como nos grupos sociais cos que se relacionan.
Apreciar os valores básicos que rexen a vida e a convivencia humana e obrar de acordo con eles.
Utilizar os diferentes medios de representación e expresión artística.
Coñecer as características fundamentais do seu medio físico, social e cultural e as posibilidades de acción no mesmo.
Valorar a hixiene e saúde do seu propio corpo, así como a conservación da natureza e do medio ambiente.
Utilizar a Educación Física e o deporte para favorecer o desenvolvemento persoal.

A Educación primaria organízase en áreas cun carácter global e integrador e será impartida por mestres que terán competencia en todas as áreas deste nivel. O ensino da música, da educación física e dos idiomas estranxeiros, serán impartidas por mestres coa especialización ou cualificación correspondente.

Referencias lexislativas

A Educación primaria na LOE (Lei Orgánica 3 Maio de 2006, de Ordenación da Educación)
Real decreto 1513/2006, do 7 de decembro, por que se establecen as ensinanzas mínimas da Educación primaria