O Ministerio de Educación a partir do apoio realizado ata agora nos Programas de Alfabetización e Educación Básica de Mozos e Adultos en Iberoamérica (PAEBA), en colaboración coa Axencia Española de Cooperación Internacional para o Desenvolvemento (AECID) e outros organismos internacionais, desenvolve unha liña de traballo cuxo obxectivo é apoiar proxectos educativos para o desenvolvemento, arredor das áreas de formación técnico profesional, as tecnoloxías da información e a comunicación, a educación especial e a inclusión educativa e a extensión da alfabetización e a educación básica a grupos sociais con especiais dificultades de acceso á mesma como as mulleres sen educación ou formación básica, a poboación rural, urbano marxinal ou reclusa.
Dentro de cada unha destas áreas de actuación, o Ministerio de Educación propón establecer redes abertas á participación e ao intercambio técnico de todos os países, como forma de intercambio entre os Ministerios de Educación Iberoamericana.
Na actualidade están en funcionamento na área de Educación Especial e Inclusiva (Rede Iberoamericana Intergobernamental de Cooperación para a Educación de Persoas con Necesidades Educativas Especiais RIINEE, a Rede Iberoamericana de Cooperación para a Educación de Persoas Novas e Adultas RIEJA , e a Rede Iberoamericana de Tecnoloxía Educativa (RIATE 
).
Preténdese fortalecer a oferta de alfabetización e educación básica de mozos e adulta vinculada aos PAEBA naqueles sectores xeográficos ou sociais con maiores carencias e necesidades, especialmente as mulleres, a poboación rural, urbano-marxinal e reclusa.
Do mesmo xeito quérese ampliar a cobertura ata acadar a titulación de secundaria e ofrecer a modalidade de educación semipresencial e a distancia.
A alfabetización e educación básica de mozos e adultos adquire o seu pleno sentido no marco dunha formación para o traballo. A vinculación da capacitación laboral aos PAEBA foi e é unha constante desde o seu inicio: fortalecer os centros de capacitación xa existentes, mellorar a formación dos técnicos docentes, actualizar e axeitar a oferta formativa, establecer vínculos con entidades públicas e privadas que faciliten a inserción no mercado de traballo... son algunhas das accións que se están levando a cabo.
Especial atención merece o apoio que se está dando aos Ministerios de Educación de cada un dos países na reforma dos sistemas de Formación Técnico Profesional e na elaboración de materiais curriculares e lexislativos específicos.
A sociedade da información do século XXI demanda unha cidadanía que adquira plenamente a competencia dixital. As tecnoloxías da información e a comunicación convértense así en obxecto de aprendizaxe e ferramenta indispensable nos procesos educativos, ofrecendo un abano de oportunidades para todos os sectores da comunidade educativa que axudarán a lograr o pleno desenvolvemento humano e a integración social e laboral dos individuos.
As accións de cooperación centradas en aplicación das TIC en formación de profesorado, intercambio de contidos, asesoramento técnico, apoio á xestión dixital de recursos, impulso dun patrimonio educativo dixital común e fomento das redes de cooperación educativa son iniciativas dirixidas aos diferentes sectores implicados que se desenvolven de maneira continuada co obxectivo de fortalecer os sistemas educativos nacionais a través da cooperación.
A través do Proxecto Aula Mentor, presente nos PAEBA desde 1999 preténdese continuar e fortalecer unha liña de formación a través de Internet, de carácter aberto, flexible e adaptada aos intereses dos beneficiarios. Desta forma, bríndase ao persoal técnico e administrativo, aos docentes e aos alumnos dos Programas a oportunidade de actualizar o seu perfil profesional ou mellorar o seu acceso ao mercado laboral.
Dentro das liñas de actuación da cooperación educativa española, ocupa un lugar preferente a atención a persoas con necesidades educativas especiais. Neste sentido o Ministerio de Educación de España quere apoiar e reforzar os sistemas de Educación Especial de cada un dos países, mellorar as súas infraestruturas, colaborar no deseño e elaboración de materiais e na formación dos docentes que atenden a este colectivo.
